Elke Donderdagmiddag is die Kruinpark Aftree-oord se restaurant gevul met vrolike klanke wat deur die Kruinpark-orkes verskaf word.
Die orkes bestaan uit vyf lede. Hulle is Johan Vorster (kitaar), Alida Diederiks (klawerbord), Dorothy Klatter (trekklavier), Ferdi Holtzhauzen (ukulele) en Mauritz Britz (viool).
“Ons speel nou ongeveer twee maande saam, en geniet dit vreeslik. Oorspronklik was dit net ek en Alida wat saam gespeel het, maar later het Dorothy, Ferdi en Mauritz ook by ons aangesluit. Nou is ons ‘n jolige klompie bymekaar,” het Johan verduidelik.”
Hy het bygevoeg dat net twee lede van die orkes kan musiek lees, en het gesê, “Dorothy speel die trekklavier op gehoor. Sy is baie goed; sy luister so een of twee keer na die wysie, en dan speel sy hom saam!”
Johan se musiekinstrument is baie uniek, en hy het trots vertel dat hy dit self gemaak het, “Ek het eenkeer op televisie gesien hoe ‘n musikant hierdie tipe kitaar gebruik, en het daar en dan besluit om vir my ook een te maak. Ek het die hout, olieblik, snare en alle ander benodigdhede gaan koop en ‘n jaar-en-‘n-half later, het ek my kitaar gehad.
Dit was nie maklik om te maak nie en ek het ‘n hele paar blikke eers opgemors voordat ek met dié pragstuk kon spog!”
Die orkes oefen elke Donderdag vanaf 2.30nm to 4nm in die restaurant, en Johan het gesê, “Ons is nog nie so goed soos wat ons graag wil wees nie, maar met elke oefning raak dit net beter. Ons beoog om later ‘n paar konserte te reel, asook vermaak vir die oord se inwoners te verskaf, maar ons sal, nader aan die tyd, kennisgewings uitgee.”
Hy het bygevoeg dat hulle altyd ekstra orkeslede sal verwelkom, en het gesé, “As daar enige inwoners is, wat ook musikante is, wat belangstel om by ons aan te sluit, is hulle baie welkom.”
Vir enige navrae, kontak Susan Vorster by 011 768 7876
Het jy dalk meer inligting rakende dié storie? Stuur gerus vir ons ‘n e-pos na roodepoortrecord@caxton.co.za (sluit asseblief kontakbesonderhede in) of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes
Besoek ook ons Facebook, Twitter en Instagram blaaie om jou stem te laat tel!
